Ky veprim që e bëjmë çdo ditë po na shkurton jetën – më keq sa duhani!

E keni pyetur ndonjëherë veten se sa orë në ditë qëndroni ulur? Me siguri më shumë nga sa mendoni! Mesatarisht, një i rritur amerikan kalon mbi 9 orë në ditë ulur.

Periudhat e zgjatura të qëndrimit ulur duket se rrisin rrezikun e vdekjes nga sëmundjet kardiovaskulare dhe kanceri.

Sipas Qendrave për Kontrollin dhe Parandalimin e Sëmundjeve (CDC), mbi 75% e njerëzve nuk arrijnë të përmbushin nivelet e rekomanduara të aktivitetit fizik. Por, sa më i aftë të jesh nga ana fizike, aq më gjatë ka gjasa të jetosh.

Studimet, përfshirë një botuar në Journal of the American Medical Association, tregojnë se një stil jetese sedentar mund të jetë edhe më i dëmshëm për shëndetin sesa pirja e duhanit, sëmundjet e zemrës apo diabeti.

Trupi ynë është krijuar për të lëvizur

“Trupi ynë është krijuar për të lëvizur,” thotë Matt Janus, fiziolog dhe koordinator i mirëqenies në OSF Healthcare në Illinois. “Lëvizja rrit rrahjet e zemrës, na bën të ndjehemi më energjikë, lëshon endorfina dhe përmirëson humorin. Gjithashtu, është një mekanizëm i mirë për përballimin e stresit.”

Megjithëse ushtrimet fizike të planifikuara janë të rëndësishme, është thelbësore të qëndrojmë aktivë gjatë gjithë ditës.

Ndryshime të vogla

Edhe nëse stërviteni rregullisht, të qenit aktiv gjatë ditës është po aq e rëndësishme. Këtu janë disa strategji që mund t’ju ndihmojnë:

Vendosni një alarm

Nëse keni një orë inteligjente ose FitBit, programojeni për t’ju kujtuar të lëvizni çdo orë. Në mungesë të saj, mund të vendosni një alarm në telefon.

Filloni ngadalë

Nëse keni qenë inaktiv, filloni me lëvizje të shkurtra prej 5-10 minutash. Qëllimi është të arrini rekomandimin e CDC-së për të paktën 150 minuta aktivitet aerobik të moderuar çdo javë.

Diversifikoni aktivitetet

“Rekomandojmë një kombinim të ushtrimeve aerobike dhe forcimit të muskujve,” sugjeron Janus. “Një ushtrim mund të përfshijë ecje të shkurtër ose ecje në vend, ndërsa tjetri mund të përfshijë ulje-ngritje, squats apo pompa në mur.”

Shijoni lëvizjen

Zgjidhni aktivitete që ju bëjnë të ndiheni mirë. Vallëzoni në dhomën e ndenjes, sfidoni partnerin ose fëmijët në një sport apo garë vrapi, ose praktikoni yoga. “Nëse bëni diçka që ju pëlqen, do ta vazhdoni më lehtë,” thotë Janus. “90% e suksesit është vetëm të filloni.”