Komandanti Ismet Jashari – Kumanova
Më 25 gusht 1998, në betejën e Luzhnicës së Rrafshnaltës, ra heroikisht komandanti i Ushtrisë Çlirimtare të Kosovës, Ismet Jashari – Kumanova. Jeta dhe veprimtaria e tij mbeten shembull frymëzimi për brezat që erdhën pas.
Ismet Jashari lindi në vitin 1967, në fshatin Orizare të komunës së Kumanovës. I rritur në një familje atdhetare, ai u formua me ndjenjën e lirisë dhe vendosmërinë për të qenë pjesë e luftës së drejtë të popullit shqiptar për çlirim.
Pas Epopesë së Prekazit më 5, 6 dhe 7 mars 1998, ai nisi përgatitjet për të hyrë në Kosovë. Më 11 mars të atij viti, së bashku me Fehmi e Xhevë Lladrovcin, Mirush Dakën, Bekim Berishën, Agim Bajramin, Fatmir Limajn, Haxhi Shalën e shumë të tjerë, arriti në Likoc të Drenicës, aty ku po pulsonte zemra e rezistencës.
Në mars 1998, së bashku me shokët e tij, formoi njësitin ushtarak “Çeliku”, me bazë në Kleçkë, ku mori pjesë në organizimin dhe forcimin e radhëve të UÇK-së. Vetëm pak kohë më pas, në prill të vitit 1998, gjatë një detyre në Dukagjin, ai u plagos në të dy këmbët, por kjo nuk e ndali rrugën e tij.
Në gusht të po atij viti, në betejën e pabarabartë të Luzhnicës, komandanti Ismet Jashari dha jetën për lirinë e Kosovës. Rënia e tij është dëshmi e trimërisë, vendosmërisë dhe sakrificës së pashoqe për atdheun.
Ismet Jashari – Kumanova mbetet përjetësisht në kujtesën e popullit si simbol i qëndresës dhe heroizmit.
