Sot mbushen 13 vjet që është ndarë nga jeta aktori dhe regjisori Sheri Mita. Nderim dhe respekt për figurën e tij!
Sheri Mita (1943-2012). Aktor, regjisor, dramaturg. Lindi në fshatin Fterrë të rrethit të Sarandës, më 14 mars. Kreu studimet e larta për aktor në Institutin e Lartë të Arteve, më 1967. Punoi si aktor në teatrin “Skampa” të Elbasanit (1967-1968), në Teatrin Popullor (1970-1976); si regjisor i Estradës së Beratit (1976-1988), i Cirkut të Tiranës (1988-1993), drejtor dhe më pas udhëheqës artistik i Estradës (1996-2004).
Luajti si aktor në teatër disa role kryesore, si: autori “Shtëpia në bulevard” e F. Paçramit, Muhameti “Fytyra e dytë” e D. Agollit); po ashtu në kinematografi, ku spikati me interpreitmin e tij dinamik në rolet: Vili Heler në filmin “Ngadhnjim mbi vdekjen”, Xhelo Paterica, “Yjet e netëve të gjata”, Qëndro Bukhudhra, “Vitet e pritjes”, si dhe në filmat televizivë “Oreksi i madh” dhe “Çanta e zezë’.
Si regjisor ka vënë disa pjesë në Teatrin e Beratit, ndër to edhe dramën “Dy krisma në Paris” (bashkautor me P. Kullën), e cila përuroi edhe ngritjen e Teatrit Profesionist të qytetit, duke vijuar më pas me vënien në skenë të pjesëve “Vajza optimiste”, “I cuditshmi”, kurse në Estradën e Tiranës dhe Teatrin e Korcçës vuri në skenë komedinë “Divorci”. Nga shfaqjet që shënuan sukses në Estradën e Beratit përmenden: “Gjueti e thëllëzave”, “Kontrolli i cilësisë”, “Dhuratat”.
Sh. Mita njhiet si autor i disa pjesëve skenike ,ku veçohet komedia “Këshilli i ndikullave”, e vënë me sukses në teatrin “Migjeni” të Shkodrës nga regjisori Serafin Fanko. Vepra u shqua për krijimin e një situate gazmore si dhe disa tipave komikë, Leos dhe tri ndrikullave, përmes të cilëve u shpotit zakoni i vjetër i martesave me mblesëri, sikundër edhe vesi i marrjes nëpër gojet etj.
Sh. Mita ka shkruar disa drama si “Dy krisma në Paris” (bashkautor me P. Kullën), “Vite të paharruara”, “Njeriu im më i dashur”, komedinë “Familja e madhe”, si dhe mjaft materiale të shkurtra humoristike për teatrin e varietesë. Në vitin 2004 i është dhënë Urdhri “Naim Frashëri i Arte”.
