Mjeshtri i Madh i humorit shkodran e shqiptar, Besnik Çinari, feston sot 71- vjetorin e lindjes. Një emër i spikatur dhe me kontribute të veçanta, Çinari rreshtohet tashmë si vazhdues i denjë i emrave të mëdhenj si Tano Banushi, Paulin Preka etj.
Besnik Çinari, Mjeshtër i Madh, ka lindur me 8 prill 1954 në Shkodër. Besniku rrjedh nga një familje qytetare shkodrane, e cila gjithmonë ka respektuar dhe ka dhënë kontributin në mbajtjen gjallë të traditave të qytetit.
Që në moshën adoleshente filloi të punojë në ndihmesë sadopak për ekonominë e familjes. Talenti i tij evidentohet që në moshën 16- vjeçare, ku merr pjesë në trupën e estradës së ndërmarrjes “Parku i Mallrave” duke kontribuar për 11 vite.
Përkrahjen më të madhe e mori nga artisti i shquar Pjerin Ashiku. Besa, si e thërrasin të gjithë, nuk e harron kurrë këtë përkrahje e Pjerin Ashikut. Ai para 4 vitesh organizoi një shfaqje mirënjohje për këtë artist të madh.
Shërbimin ushtarak e kryen në Durrës, ku edhe aty aktivizohet në estradën e repartit dhe jo vetëm. Talenti i tij nuk i shpëton vëmendjes së profesionistëve të estradës. Besës i vjen oferta nga regjisori Gjegj Vlashi, që të qëndrojë në estradën e Durrësit. Dashuria për qytetin dhe “detyra” si djali i madh i familjes nuk pranon.
Pas shërbimit ushtarak, ai vazhdon të aktivizohet, tashmë si një nga aktorët kryesorë në pallatin e kulturës “Vasil Shanto”. Këtu mbështetet dhe nga aktori i shquar Gëzim Kruja, i cili e merr në trupën e Duhan Cigares.
Një ditë e rëndësishme për karrierën e tij, është 10 maji i vitit 1982. Besa fillon punën si aktor profesionist në estradën e teatrit “Migjeni”. Në studion e provave të estradës e presin themeluesit e saj, mjeshtrat e humorit Tano Banushi, Hasan Smaja, Paulin Preka, Zyliha Miloti, Bik Pepa, Jolanda Shala, Katerina Biga, Zef Deda, Drade Xhaj, dhe regjisorin e madh Paulin Sekuj.
Profesionalizmi dhe eksperienca e kësaj trupe ishte një shkollë e madhe për Besën. Ai me talentin e tij e ndjeu veten të barabartë me kolegët, falë dhe dashurisë së tyre. Më vonë kësaj trupe iu bashkuan Edmond Halili, Aleks Selmani dhe Anton Krosaj, si dhe të përhershmit që vinin nga trupat amatore, Gëzim Kruja, Gjosho Vasija, Sandër Ruçi, Muhamet Çekini etj.
Besnik Çinari ka punuar me regjisorë të shquar të estradës së Shkodrës dhe jo vetëm, si me Paulin Sekujn, Edmond Mhillin, Zehrudin Doklen, Arben Haverin, Gjergj Vlashin, Fatbardh Smajan, Arian Çuliqin, Bruno Shllakun dhe së fundi, me Altin Bashën.
Gjatë karrierës së tij 37 vjeçare si profesionist ka marrë pjesë mbi 110 premiera, ka realizuar mbi 500 role dhe pjesëmarrës në mijëra koncerte të ndryshme në të gjitha skenat e Shqipërisë dhe në vende ku jetojnë e banojnë shqiptarët.
Besniku është autor i dhjetëra skeçeve, parodive, kupleteve , tekste këngësh. Besnik Çinari në vitet e fundit e shohim dhe si bashkautor, autor dhe regjisor të komedive dhe varieteve në estradën e teatrit “Migjeni”.
Për veprimtarinë e tij artistike është vlerësuar:
Në vitin 1985 – Medaljen “Naim Frashëri”
Në vitin 2002 – Fitues i çmimit të parë të kamerave të fshehta “Personazhe në kurth” në RTSH.
Në vitin 2008 – Titulli “Mirënjohja e Qytetit”
Në vitin 2017 – “Mjeshtër i Madh”
